الفيلم تصنيفه ميوزكال ( غنائي استعراضي )
الفيلم مأخوذ من عمل الكاتبه الامريكيه (جين ويبستر ) صاحب الظل الطويل
ومن اخراج تامر المهدي
الحقيقه الفيلم ده علي قد ما ممكن اتكلم فيه عن تفاصيل فنيه الا انه هيفضل في الاخر سبب سعاده ليا ان احنا كعرب عملنا اخيرااا فيلم يتقال عنه ميحا ميوزكال بمستوي محترم علي مستوي الصوره والانتاج والالحان ده غير ان معظم الفيلم منطوق باللغه العربيه الفصحي وده شيى لطيف جدا
الفيلم مدته ساعه وتلت وده وقت مناسب لان اطول من كده كان هيبقا صعب
الفيلم من انتاج مجموعه mbc
القصه عن دار ايتام فيها اطفال بيشتغلو في مدينه و عايشين مع مديره دار شريره واختها الطيبه وشخص بيقوم بدور السواق والطباخ والمدرس وكل حاجه تقريبا في حياتهم 😅 وبيحصلهم ايه في التنبي او بيستغلو وبيتعاملو ازاي في الحياه
الحقيقه علي مستوي الكتابه فا الفيلم مأخوذ عن قصه اجنبيه وتم اعاده كتابه وصياغه وسيناريو وحوار وكلمات الاغاني ل هبه مشاري حماده ) والحقيقه عامله مجهود كبير وعامله شغل كويس جدا عشان تقدر تعمل معادله بين النص الاصلي اللي مكتوب من تقريبا ١٠٠ سنه و في تفاصيل حلوه زي ذكر معلومات عن علماء عرب و اهميتهم واعمالهم وده مهم للاطفال يوصلهم من اعمال فنيه وفي قيم ورسائل مهمه بتتقال في الفيلم الحقيقه للاطفال بالذات واحنا محتاجين ده جدااااااا .
الاعمال الميوزكال سواء مسرح او سينما دايما بيبقا اهم تلت عناصر فيه الاغاني والالحان والاستعراضات والحقيقه هنا انا شايف اقوي حاجه في الفيلم ده الألحان والاستعراضلت حلوه جدا وفيها مجهود خاصا ان معظمها بيأديها اطفال ودول تدريبهم صعب جدا
والحقيقه الالحان ل ( ايهاب عبد الواحد) والموسيقي التصويريه ل ( خالد الكمار ) الاتنين عاملين شغل عالمي حلو جدااا ومدي قيمه للفيلم وهما اقوي عناصر الفيلم بالنسبالي
الديكور والاكسسوار والملابس الحقيقه فيهم مجهود كبير ومحترم ويرتقي لمستوي المشاهده و منافسه نفس نوعيه الاعمال دي عالميا مهما كانت ملاحيظك بس يظل مستوي محترم جدا ويقدر جداااااا برافو الحقيقه.
الاخراج : بقا ده ممكن نقول في شويه حاجات من ناحيه الايقاع او اختيار بعض الممثلين بس لازم تحط في الاعتبار ان اخراج عمل زي ده صعب لدرجه مرعبه انه يطلع صح وتحتفظ علي ايقاع وتمثيل ولغه عربيه وتوجيه ممثلين واداء حركي فا موضوع صعب فا يستحق الاشاده انه مخرج مش اجنبي وقادر يوصل لمستوي محترم للمشاهد
وهو عامل تفصيله ذكيه جدا الحقيقه ان الفيلم مش كله لغه عربيه فصحي صريحه والا الناس كانت هتمسك فيهم علي كل كلمه وتشكيل فا هو دخل اللغه العاميه احيانا في بعض الجمل ودي بتتسمي اللغه التالته اللي هي خليط بين العاميه والفصحي كانت بتستخدم في عروض مسرح زمان لتوفيق الحكيم وليها كابع لطيف و أحيانا تضيف طابع كوميدي عشان تفك ايقاع اللغه العربيه اللي فيه تفخيم ،
الحقبقه أختيارات الممثلين بالنسبالي فيها الموفق جدااا زي (استاذه ماجده زكي او محمد ثروت او ريهام الشنواني او معتز هشام او عباس ابو الحسن ومحمد دياب وعلاء زينهم ) الحقيقه عاملين حاله وشخصيات وروح للادوار لطيفه جداااا والتطفال اللي مختارينهم حرفيا تلت اربعهم كويسين جدااا وشاطرين
انما انا شايف اختيار (حلا الترك ) اللي تعتبر بطله العمل ودورها كبير ومهم شايفها مقبوله بس الحقيقه مكنتش احسن اختيار للدور بالنسبالي وكان فيه فتور في ادائها وتعابيرها وتحسها شغاله بفكره فيها تعالي وتفخيم في الاداء كانها بتعمل اعلان لرمضان مش عايشه شخصيه الفيلم او سايبه بصمه خاصه فمأثرتش فيا ايجابا الحقيقه وبتمثل بطريقه شعريه مسرحيه اكنها بتقرا من كتاب او جرنال مش عامله روح للشخصيه وده الفرق بين واحد شاطر في الالقاء وواحد شاطر تمثيل و انك تعمل روح للكلام اللي بتقوله بس علي مستوي الاداء الحركي والغناء مميزه الحقيقه انما التمثيل محتاجه شغل شويه علي نفسها .
وفي برضه الاطفال المميزين اللي قدرت اوصل لاسم بعضهم زي ( وديمه احمد و ياسمينا العبد و ماريا جمعه و بافلي ريمون الحقيقه كلهم موهوبين ماشاء الله عليهم احسن من ممثلين نجوم مبيعرفوش يقولو كلمتين علي بعض )
الخلاصه ايا كان ملاحظاتي الفنيه علي العمل ده سلبيا او ايجابيا بس انا ممكن اعمل مش واخد بالي منها كلها لمجرد اني ادعم العمل ده واننا نشوف انماط واشكال مختلفه عندنا كعرب خاصا لما يبقا العمل تجربه جديده وفيها انتاج ضخم وفيها شجاعه انها تتعمل مع ان ممكن يبقا معروف ان العمل ده جماهيريا مش هيحقق نجاح كبير لان ثقافه الشعوب العربيه لسه محتاجه توسع شويه وان افاقهم تبقا منفتحه لاعمال فنيه بشكل كبير والاعمال اللي زي دي هتبقا فرصه ان ده يحصل ويتكرر باشكال مختلفه قا اتمني الناس تدي نفسها فرصه تشوف الفيلم لانه فيلم مبهج وجميل وفيه مشاهد فنيا حلوه قوي خاصا علي مستوي الموسيقي والفيلم عامل زي افلام ديزني بس بطبع خاص و بشكل عربي وبلغه عربيه اللي قربت تندثر في جيل الاطفال اصلا وحسيت ان حتي الممثلين واجدين صعوبه كبيره في انهم يظبطوها وكفايه ان العمل بيقدملك عمل فني من غير اجندات قذ*ره تتحط في النص زي اعمال ديزني
الفيلم مش جماهيري بس فيلم عائلي لااطفال لطيف و متقدم عمل فني محترم واتمني اشوف تجارب فنيه زيه فيها اشكال مختلفه عن الأنماط المحفوظه المضمونه اللي بتجيب فلوس وخلاص وبحيي مجموعه mbc انهم عملو الفيلم ده الحقيقه
تقيمي الفني للفيلم ٨ من ١٠
تقيمي للمشاهدين يشوفوه ولا لأ ٩ ونص من ١٠
#سكر
#mr_director